Cuntorni : un festivali literariu in Portivechju

Portivechju cità di u turismu, Portivechju avanguardia di u peghju, Portivichjacci corpi à balisgia… Ci sarà calchì verità in tutti ‘ssi difinizioni micca sempri affizziunati. Ma puri oghji si pò aghjunghja un altru qualificativu à a cità di u stremu miziornu di l’isula : Portivechju hè dinò una cità literaria.


Di ghjunghju l’ustilità artistichi erani stati aparti da un prima festivali urganizatu da a libraria Le Verbe du Soleil. A manifistazioni, intitulata « Lire au Soleil », avia pirmissu à u publicu di scuntrà l’autori cussì diversi chè Jean d’Ormesson, Jérôme Ferrari o Milena Agus. Ci n’era pà tutti i gusti è tantu meddu. I dibattiti è i scontri erani stati ricchi, è à no c’era piaciuta ‘ssa vulintà d’apartura è di buliumu chì pirmittia à l’autori cuntinintali, corsi o stranieri di scuntrassi in a stessa arghja è di sparta i so primuri rispittivi di pettu à a criazioni.


Ma u festivali cuntinivighja, sì no pudemu dì. Cù d’altri urganizatori, d’altri autori è d’altri tematichi missi in avanti, tocca avali à u Festivali Cuntorni d’andà à a scontra di u publicu i 2 è 3 d’uttrovi 2009. U locu di i cuntrasti è di i sirati musicali (Enzo Favata, Enedina Sanna, Sos Cantores di Cuglieri è Petru Gambini) sarà à u Centru Culturali, mentri chì l’after si passarani à tardi à u Bastion di Francia cù i musicanti Lino Straulino (di u Friuli), u gruppu Sitikis (Sardegna) è forsa dinò certi impruvisatori di ‘ssa parti quinci di u Mari Tarraniu.


Da a parti literaria di l’invitati, sò annunciati scrittori è pueti di setti pruvinci di i zoni « periferichi » di l’Auropa, postu chì a tematica di u festivali hè quissa quì : metta in rilazioni criatori di i rigioni ditti scantati, è alluntanati da i grossi centri di pruduzzioni di a criazioni. Ma puri criatori chì quantu volti si trovani, è pocu premi a scelta di a so lingua, in una vera mudernità di a sprissioni artistica.


Cussì da a Sardegna affaccarani Marcello Fois, Francesco Abate è Alberto Masala. Tutti autori di rinoma chì a Corsica ni senti parlà o hà ghjà avutu l’occasioni d’accodda. Da a Catalogna ghjunghjini a talintosa Najat El Hachmi, chì veni di vincia u premiu di i Lettari Catalani cù u so rumanzu « L’últim patriarca », è u pueta Gérad Jacquet. Miguel Angel Arcas vinarà iddu da l’Andalusia, mentri chì Francesco Pallara è Giovanni Rizzo ci farani scopra a puisia di u Salentu. Jean-Yves Casanova, pà l’Uccitania, ma dinò Maurizio Mattiuzza, di u Friuli, cumplittarani u stolu di l’invitati sterni. Trà i Corsi prisenti, pudemu annuncià, trà altri, à Ghjacumu Fusina, Jérôme Ferrari, Patrizia Gattaceca o Stefanu Cesari…

Eccu dunca un appuntamentu chì, suvitendu à Gorizia 2006 è Perpignan 2007, farà viaghjà ‘ssu festivali ghjirandulonu sin’à i nosci spondi criatrici.